صباح نفيساوى جدا
صباح نفيساوى جدا
فتحت عينى من النوم آه ..أأأ..هـــ
واتاوبت .. هــــاهوووووا
وإذا بكتل من الدبش بتقع على راسى كانت متعلقه فى السقف مستنيانى أفوق من النوم الغياهيبى الى كنت غرقانه فيه وطبعا الكتل دى ما هى إلا الحاجات اللى ورايا والمسئوليات اللى المفروض أقضيها النهارده ...
يافتاح يا عليم ..
النهارده طبيخ غسيل ترويق للشقه طبعا مش لدماغى والدبشه التقيله اللى توجع الراس فعلا العيال أكل وشرب وحموم وغيار والواد عاوز يذاكر اصل ابن مصيلحى لازم يذنبنى جنبه اعمل الواجب معاه وإلا مايرضاش يكتبه والبت بنت نفيسه اللزقه , لزقه فيا لزقه سودا لوحد خدها وخالها الطيب راضى عنها وساكته فى امان الله تشوف وشى السارينه تشتغل وهاتك يا زن لحد لما آخدها مش عارفه دا صرع دا واللا إيه
المهم بعد دا كله لازم أخرج أشوف ست الحبايب وأزور ماما الحاجه وكام زياره تانيين كده لزوم العلاقات العميه .. دى تعبانه ودى ولدانه ودى مسافرانه وانا زهقانه بس كله بثوابه مش عارفه اقطع نفسى أنا واللا إيه أنا عاوزه 72 ساعه فى اليوم علشان اخلص اللى ورايا.
اقوم احسن بلا تضييع وقت
بسم الله .. الحمد لله الذى أحيانا بعد ما أماتنا وإليه النشور .
أما أقوم أصلى الضحى الأول وبعدين اشوف اللى ورايا , إيه سامعه حد بيقول خوجايه قايمه الساعه 9 , امال انتوا عايزين إيه بعد الهده دى طول النهار اصحى الفجر؟ عموما لما ربنا بيكرمنى باقوم أصلى الفجر وأنام تانى .
يانفيساااااااااه ... المكوه يانفيسه
دا مصيلحى صباحوا مكوه دايما كده عنده استعداد يخرج من البيت مكسر ولا يكويش لنفسه , بس الحق يتقال ساعات كده أصعب عليه مره كده كل كام شهر يكوى لنفسه لما يكون مزنوق يعنى
الواد بينادى عاوز الحمام ومصيلحى فى الحمام والبت عاوزه ترضع
قطعونى 4 حتت واوعوا ترمونى للقطط احسن مصيلحى مش هايلاقى حد يكويله.
حالة طوارئ" ج"
يا فتاح يا عليم الميه قاطعه عالصبح يعنى مش كفايه جايبينها لنا من مصلحة المجارى وغمض عينك وسد مناخيرك كمان يقطعوها يادى وقف الحال عموما
ننتقل للخطه " ب"
الخطه" ب" دى لعلمكوا سريه جدا ما يعرفهاش غير افراد عائلة مصيلحى ونفيسه وتقريبا كل اسره فيكى يا بلد بس اوعوا تقولوا لحد عموما ايه هي الخطه "ب" نستخدم خزان الطوارئ اللى سعته 10.3 لتر مكعب وبه من الماء ما يكفى لغسيل وش أسرة نفيسه ومصيلحى وممكن مع ترشيد الإستهلاك مصيلحى يغسل راسه ورجليه
شهقه عميقه طالعه من صباع رجلى الصغير مع بيان هام
بتقولوا خير , لا خير بس مصيلحى فى الحمام
طب وإيه المشكله ؟
لا ماهو الخزان فى الحمام ..
صحيح لاتكونوا... لااااا ...
اصل الخزان بتاعنا جردل كده بس على نضيف شويه .. فيبر إيه.. فيبر إيه .. فيبر كلاس لا واحنا برده بتوع الحاجات دى.
يا حلاوه .. مصيلحى خلص الخزان
الأمر لله وحده نتنقل للخطه "د"
ودى بقى انا شخصيا ماباحبهاش ؛ واد يابن مصيلحى روح خبط على ابلتك عدلات جارتنا قولها معلش ياتانت سلفينا إزازة ميه على أول الشهر أصل بابا فى الحمام وخلص الخزان.
الحمد لله نفعت الخطه " د " والخسائر الماديه اقتصرت على ديون بما يوازى إزازة ميه يتم سدادها على اول الشهر وفوقها كام دعوه هديه لزوم المهلبيه.
مصيلحى لسه فى الحمام والأمن مستتب والواد واقف بيعيط ... طلعيه من الحمام اشمعنى هوا بيطلعنى , يا واد اصبر ابوك متأخر ع الشغل ياواد الحق أختك لا تقع من عالسرير, دايما الواد ده معصبنى اعمل فيه إيه دماغه زلطه.
هدوووووووووووووء
نقطة نظام يا اولاد مصيلحى
المفروض إن بعد الكلمتين دول الصوره تتجمد والساعه عقاربها تقف بس دا مابيحصلش إلا فى الأفلام أما ولاد مصيلحى ونفيسه فدى كلمة السر بتاعتهم علشان اللى بيزن يعيط واللى بيعيط يصرخ واللى ...
أقولكم تلاقينى صدعتكم لا بجد حاسه إنى صدعتكم عموما اللى صدع ياخد له اسبرينه على حسابى علشان تعرفوا تكملوا امال إيه دا لسه اليوم طويل وأنا ما حكتش غير يا دوب نص ساعه بس , سامعه حد بيقول ياشيخه حرام عليكى احنا ذنبنا إيه؟
أقولك ذنبك إيه ذنبك يا أخى أنك مصيلحى تانى يعنى لازم تتعلم وتاخد بالك وتشوف الصوره صح من زاويه تانيه يمكن فى حاجه فايتاك كده واللا كده , بتقول مصيلحى إيه ؟ إنت تطول دا ضفر مصيلحى برقبتك سبعى الغالى والله وحشنى ربنا يجيبه بالسلامه شقيان ياحبة عينى.
ييه خرجتنى من الموضوع ياللى يوعدك بعروسه تكلبش فى أفاك وانت مروح يوم الثلات بتقول متجوز وماله التالته تابته واهو بالمره يلحسوا عقلك وتمشى تكلم نفسك
أنا نفيسه آه بس ما يغركش واللى بييجى عليا مابيكسبش.
ييه خرجت تانى من الموضوع خلاص خلاص رجعنا تانى كنا بنقول إيه؟
آه الميه قاطعه ومصيلحى خلص الخزان
يانفيسااااااااه
نعم نعم جايه اهو
خلصتى المكوه ؟ انا متأخر عالشغل
حاضر حاضر
تقولولى بتكرهى إيه فى حياتك عالصبح أقولكم المكوه بس كله يهون عشان خاطر مصيلحى
الحمد لله عملت دماغ مكوه إنما إيه , ريحة المكوه وهى ماشيه على الهدوم وهى مرشوشه بالبخاخه ما شاء الله تحس كده إن دماغك بتلف وزى ما تكون كده خير اللهم أجعله خير عاوز ترجع عليهم امال إيه دماغ مكوه تماااام
شوفوا يا أخواتى الراجل اللى بيقول متأخر ماسك الجذمه عمال يلمع فيها ازاى واللا القيافه اللى حاطه عليه تشوفه تقول حضرة الأفوكاتو والله ما انا عارفه أنا إيه اللى مسكتنى على كده , مستنيه إيه لما يرجعلى بواحده مكلبشه فى قفاه ؟ يله اهو دايما يقولى أجيبهالك تخدمك انتى والعيال أقوله الله الغنى. يقولى انتى اللى هاتنقيهالى اقوله الله الغنى .
سامعه حد بيقولى يا مفتريه مش تأكلى الراجل لقمه قبل ما يمشى هاينزل على لحم بطنه ؟
ودى تيجى دا انا نفيسه عمرها ما تفوتنى دى
معلقة عسل يا اخويا تقويك , لا ماليش نفس
طيب كباية اللبن دية بخيرها ترم عضمك .. لا مش عاوز
ياراجل افتح نفسى باى حاجه ,أديكوا شايفين هوا بيحب ينزل كده خفيف وبيمون بقه فى الشغل هوا واصحابه .
مش عاوزه حاجه يانفيسه أنا ماشى
الله أكبر عليك يا اخويا تسلم ربنا يحفظك
أدعيلى يانفيسه
دعيالك ربنا معاك يوفقك وينصرك على من يعاديك ويعمى عنك النسوان ويكفيك شر عيون ام فلان وام علان ويجعلك فى كل خطوه ميكروباص ويجعلك على روس الناس.
